يا ناس خلوني أتجوز

العنوسة كلمه كنا زمان ما نقدرش نقولها ولو قولناها  كانوا  يقولوا لنا  عيب طيب لحد أمتى هنقول عيب بعد خراب مالطة دا كل بيت تقريبا فيه عوانس  دلوقتي ذكور واناث الأزمة طالت كل الناس  فقير وغني وخصوصا  الطبقة المتوسطة الشاب من دول عايز يتجوز بس خايف من والد العروسة المفترى اللى عايز  يخرب بيت أمه خد عندك عفش وشقة وشبكة ومواسم وفسح وعزايم ودباديب  طيب الشباب يعملوا ايه بطالة وعطالة و فلوس بالقطارة طيب ما كل واحد يلم نفسه ويدي بنته فرصة تعيش حياتها خايف عليها يا حاج طيب  خليها في بيتك  مخلله جنبك  لو جالك شاب كويس وعلى خلق ما تديله بنتك وكن والد ليهم بنتك امانه في رقبتك بدل ما تحرمها بدافع الخوف عليها  خليها تعيش حياتها و الحياة هتمشي  ان شاء الله .

أشهر ضحكه مصرية

حسن فايق

ضحكته  غريبة وعجيبة وبيعتبرها نقاد السينما أشهر ضحكة في السينما المصرية اسمه بالكامل حسن فايق محمد الخولى اتولد في عام 1898 وتوفي في عام 1980 يعني عاش 82 عام بدأ مسيرته الفنية في عمر 16 عام مع فرقة الهواة، في العام 1914 عمل مع روزا اليوسف  في مسرحية (فران البندقيه)، وأنضم بعدها إلى فرقه عزيز عيد وأستمر معها حتى عام 1917 حيث قرر أن يكون فرقة مسرحية خاصة به وقد اشترك للعمل فيها الممثل يوسف وهبي، وقد قام حسن فايق بتأليف عرض مسرحي عرضه في أفتتاحها بعنوان (ملكة الجمال).

بدأ حسن فايق في إلقاء المونولوجات وكان يقوم بتأليفها منتقدا الظروف الأجتماعية لتلك الفترة، كما قام أيضا بتأليف وتلحين مونولوجات لغيره من الفنانين. بدأ حسن فايق مسيرته السينمائية في عام 1932م عندما شارك في فيلم (أولاد الذوات) ومن بعده فيلم (عنتر أفندي).

قدم دور البطولةمرتان فقط في فيلم حسن ومرقص وكهين مع شرفنطح واستفان روستى وليلة الدخلة مع اسماعيل يس . لم يكن بالوسامة التى تتيح له لعب أدوار البطولة ولكنني أرى انه كان مبهرا في الفلمين  وأستمر في تقديم الأدوار الثانية ومن ادواره الجميلة  لعبة الست والعيش والملح وأبو حلموس وخطيب ماما وسكر هانم  والزوجة 13 مع شادية ورشدي أباظة وشارع الحب مع عبد الحليم هو دا صاحب أشهر ضحكة في السينما المصرية

كفايه أكل نتكلم بقى

يحكي أن حاكم إسمه سليمان بن عبد الملك بن مروان  كان بيحب الأكل قوي لدرجة إنه مات من الأكل .المصادر التاريخية بتقول أنه كان بيشبع بعد أكل 100 رطل من الطعام وتعالوا نفسر يعني إيه 100 رطل يعني في يوم كان جعان قوي فجابوا عشرين خروف أكل أحشائهم كلهم يعني الكبد والقلوب والذي منه مع 40 رغيف عيش . دخل في يوم السلطان بستان فاكهه فضل ياكل فاكهة من الصبح للظهر و وقدموله خروف في الغدا ظلته كله  وكمل اكل فاكهة بعد كده الله يديه الصحة عامل زي القطر طالع واكل نازل واكل السؤال بقى كان فاضي يحكم دولة ؟  هل كان بيراعي أهل بلده ؟ ياريت اللى يحكمنا يكون قنوع  . وكانت نهايته الموت المفاجيء عفانا الله وعافاكم .

الكبير قوي بالجامد

الكبير قوي بالجامد

في ظل فوضى إختيار حاكم مصر بنرجع بالتاريخ 200سنه ورا وبالتحديد 1805 م لما كانت البلد تقريبا في نفس الفوضى  اللى  إحنا فيها دلوقتي .جه الكبير قوي بالجامد  وحكمها كانت بالنسبة له التحدي الأصعب في حياته كان عايزها دولة قوية مترامية الأطراف كان عايزها متقدمة ونجح في ده بكل اقتدار بس يا خسارة وكأن البلد مكتوب عليها الدوامه يعني بعد التقدم في عهد الكبير قوي بالجامد  رجعت تاني وتخلفت في عهد بن الكبير قوي المعلم عباس حلمي الأول وطبيعي يجي حاكم قوي وراه حاكم ضعيف بس المصيبة  انهم يكونوا زي المعلم عباس والسؤال المهم لسه فيه رجال زي الكبير قوي بالجامد ولا عينة المعلم عباس تكسب ؟ ياترى اللى جاي هيكون حلمها وهتكون حلمه ولا هيكون غمها وغمنا والله يا مصر انتي بلد عجيب وغريب كتير بيحبوكي ولما السلطة بتكون معاهم يكرهوكي .

نوفل السينما المصرية

صفا الجميل

كتير مننا يعرفه بإسم نوفل وما يعرفش اسمه الحقيقى . هو فعلا اشتهر بإسم نوفل لكن اسمه الحقيقى صفا الجميل تصوروا صفا وجميل بس عمر الأسم ما بيعكس شكل ولا مضمون خلونا في المهم يعتبر صفا الجميل من الأشخاص المحببين جدا الى قلوبنا وعندما نراه تجدنا نبتسم او نضحك على حركاته  قام صفا الجميل أو صفا محمد بالعديد من المشاهد ومن منا ينسى دوره في فيلم دهب وكان بن زينات صدقى ( الست بلطية )

 و كانت بتقول عليه الواد الحيله ودوره مع شرفتطح في فيلم خير في سلامه صاحب الصوت النشاذ في وسط التلاميذ .  هذا الرجل ظهر بصورة قبيح السينما المصرية ولكنه أكتسب حب الناس فمن يستطيع أن يقاوم نوفل

الدكتور عايز يشتغل أستاذ

لو  حد فينا سأل أى طفل وقاله نفسك تكون إيه ؟ على طول  هتسمع الجملة الشهيرة عايز  أكون  دكتور أو مهندس ولو الواد مثقف وبيحب التخصص وما تفرقش معاه الأسماء  يقولك عايز أطلع طيار أو حتى رائد فضاء بس اللى مش معقول  أنك تلاقي دكتور يقولك أنا نفسي أكون مدرس  بس دا حصل فعلا  فسألت  ذلك الدكتور لماذا ؟ فقال لي هذه مهنة ورسالة الأنبياء ويكفيك فخرا أن تعلم الأخرين ما يجهلونه المشكلة بقى فينا في الثقافة اللى خلت كل مصر عايزه عيالها داكتره ومهندسين أمال مين هيكنس الشوارع ومين هينضف المجاري ومين اللى هيعيى .ومين السواق اللى هينقل العيانيين ومين اللى هيطلع متشرد  أو متسول وفين حرامية بلدنا وفين البلطجية اللى هيرموا مولوتوف على المتظاهرين في التحرير  والنبى بقى عيشوا الواقع وتنوع الأدوار حاجه مطلوبة بصوا للغرب وشوفوا الناس عايشه إزاي  واحنا هنا  عايشين ازاي والله طول ما احنا عايزين الطب والهندسة عمرنا ما هنتقدم أبدا ....

من اليوم مافيش جيفارا فيه أحمد حراره

طبعا ناس كتير ما تعرفش جيفارا لما تعرف أحمد حراره طبعا الاولاني شبه التاني الأولاني ثورى والتاني برده ثورى  بس الفرق بينهم أن أحمد حراره صناعة مصرية مية في المية . شاب أبهر المصريين لما فقد عنيه من أجل الحرية وأصبح رمز مصري حديث . ما احنا تعبنا كتير من رموز اونطى  طلعوا فى الأخر لا رموز ولا حاجه  وانضحك علينا وعشنا في الأوهام  وغنينا انا من ضيع في الأوهام عمرا أي زمنا طويلا وسنين عدة ! ولما فقنا اكتشفنا ان فيه ناس رموز بجد مش رموز اونطى زي حراره اللى هيفضل مخلى حرارة المصريين مرتفعة لحد ما يحققوا هدفهم  احنا صحيح مش في عصر سوبر مان بس احنا في عصر الثوار والشهداء اللى حققوا اللى ما يقدرش عليه سوبر مان وبات مان كمان يا حنان .

مأساة النشرة الجوية

زماااااااان  وأنا صغير  كنت بحب أتفرج على النشرة الجوية والمذيعة الدلوعة اللى بتيجي في أخر النشرة  وتقول (  أهلا بيكم اعزائي المشاهدين مع أحوال الطقس المتوقعةغدا على أنحاء جمهورية مصر العربية  يسود البلاد غدا طقس  لطيف على السواحل الشمالية حار على القاهرة شديد الحرارة على الصعيد ....دي من الأخر نشرة كل يوم لا بيتوقعوا ولا حاجه  ولا كان عندهم قدرة على التوقع من الأصل  وجربتهم كتير  وفي الغالب توقعاتهم خاطئة لأنها غير مدروسة جيدا والأدهي من ذلك  كانت مصر تمتلك  موقع للأرصاد الجوية وأغلق هذا الموقع  لماذا أغلق لأن من كان يحكم كان يريد حتى تفشيل الشعب وجعله مغيب تماما حتى يا ناس النشرة الجوية أونطى وكذب  وفي مره أحد المذيعين سأل مدير الأرصاد ليه توقعاتكم مش مظبوطة قاله أصل  الدولة خايفه الشعب يعرف بالحقيقة يتغض  بزمتكم  دا كلام  قبلنا مخدوعين وقلنا وماله بس ليه لحد اليوم ما فيش اخبار حقيقة عن الطقس وتوقعاته  أرجع وقول ما أفسد في نصف قرن لن يصلح في  نص عام .

صاحبة أشهر روسيه

فايزة عبد الجواد

فايزه عبدالجواد صاحبة أشهر روسية في  مصر بلا منافس لو الزمن يضحكلها كان زمانها مسجلة في جينس ريكورد للأرقام القياسية . مين فينا ممكن ينسى الروسية اللي فقعتها لبكيزه هانم ( سهير البابلى )  في مسلسل بكيزة وزغلول . وبرغم كل هذه القوة الإ أنها صاحبة قلب أبيض وبسيطة جدا ولكننا نشاهد تمثيل يا جماعة يعني مش حقيقى خالص شكلها هو سبب أدوارها الخشنة وملامحها الصارمة  التى  توحى بالقوة  ولكن أكرر ان الشكل ليس دائما يعبر عن الحقيقة فكم من أناس  جميلي الشكل وقبيحي المضمون وعلى العكس  تماما هناك ناس يبدون  بملامح الأشرار وهم في الحقيقة شديدي الطيبة هذه هي فايزه عبد الجواد التى قدمت العديد من الأعمال صحيح في أغلبها مشهد أو عدة مشاهد قليلة ولكنها محبوبه ومؤثرة جدا في  أدوارها .

                                            

النوم في البرلمان حقيقة ولا خيال

مع اول جلسه من جلسات البرلمان المصري ( مجلس الشعب) ولأننا مركزين قوي قوي في البرلمان ده  حدث ما لم نتصوره وهو نوم أعضاء كثر في البرلمان يعني مثلا البعض نشر صوره لأعضاء ملتحين  والبعض نشر صوره لدكتور عمرو حمزاوي  المهم  دار صراع هل  كانوا نايمين ولا مريحين ؟ والدنيا قامت ما قعدت المهم  أنا مش مهتم قوي  بموضوع النوم ده اللى هاممني أني أول مره أشوف المصريين مركزين قوي في التفاصيل بعد ما كنا  مش مركزين في حاجه  خالص   يعني مثلا كنا مركزين الأهلى فاز بالحكام ولا باللعب والزمالك فاز بضربة جزاء صحيحة ولا أونطى  يمكن تكون بداية للتركيز في كل حاجه حولينا  .

جاكوار باو ( قدم النمر الأسود )

شخصية لفيلم شهير تدور أحداثه في أمريكا الوسطى  في الفترة التى سبقت الكشوف الجغرافية  وهذا الفيلم يدور حول التضحية البشرية  كيف كانت حضارة المايا تستخدم الضحايا البشرية من اجل إرضاء الألهة  . يبدأ الفيلم  بمجموعة من الصياديين الهنود وهم يقومون بصيد حيوان بري  وكيف يشعرون بالسعادة في تلك الحياة البسيطة وبعد الإنتهاء من الصيد  يتوجهون الى القرية ومعم صيدهم وبالليل يبدأون إحتفالاتهم الليلية على الرقص حول النار وحول  حكيم القرية وفي الغالب يكون أكبر الرجال سنا  و في  الصباح الباكر يهجم  الأشرار على القرية ويقتلون  الزعيم ويأسرون  الرجال والنساء بما فيهم جاكور باو  ذاهبين بهم الى عاصمة المايا من اجل التضحية بهم ومع استمرار الاحداث يهرب جاكوار الى القرية بعد النجاح في قتل الأشرار ويقرر العودة مره أخري للغابة من اجل بداية جديدة الفيلم من اخراج ميل جيبسون ويعد تحفه فنية حقيقية وان كانت دراما مفزعه لما كانت عليه شعب المايا .

انت تجرى وانا اجرى والكعبلة بصباع رجلى

دي مقوله شفتها مكتوبة على توكتوك  من التكاتك الكتير قوي اللى ملت مصر يا فرحة أحمد عز دخل التكتوك  هو في الحقيقة فاد ناس كتير لكن في العموم شوه صورة مصر وجعلها زي مدينة كلكتا في الهند ودي مدينة عشوائية للغاية يعني مثلا ما بقناش نعرف نمشى وتلاقي صاحب التكتوك من دول يقطع عليك الطريق فتطر الى الركوب بس السؤال كل يوم بيتولد الف تكتوك والظاهر ان التكاتك مش عامله تنظيم أسرة دا وصل عددهم بالملايين  طاب والحل نلغي التكتوك ولا نزوده الظاهر إننا محتاجين معجزة  ولا إيه

زمهلاوي والحقيقة بتفرج على الدوري الإنجليزي

لو سألت فنان ولا سياسي لامع ولا حتى مرشح  لرئاسة الجمهورية  هو أهلاوي ولا زملكاوي في الغالب هيقول زمهلاوي يعني  هيرضى الطرفين  التعصب يا جدعان بقى حاجه صعبة قوي  يعني مثلا لو واحد كويس قوي وطلع زملكاوي صديقة يقوله عيبك الوحيد أنك زملكاوي والعكس صحيح مال الأهلى ومال الزمالك بالحب والكره كل واحد حر يشج اهلى يشجع زمالك يشجع أسوان كل انسان حر  ونفضل بقى مستنيين الماتش شهر وفي الاخر  يطلع معركة ما هو من التعصب  لو كل واحد قال اللى جواه من غير ما يخاف هيزيد احترام الناس له لأنه صريح  والصراحة راحه  ولا إيه

مربه يا معلمي مربه

حد فينا ممكن يتفرج على فيلم  حماتي ملاك وينسى الواد غزال صبى الحانوتي الغشيم اسماعيل يس  طبعا لا وخصوصا وهو بيقول ( منبه يا معلمي منبه ) أدي الدور ولا أروع  دا حتى فيه ناس قالت عليه أهبل  هو ماكانش أهبل ولا حاجه  دا فنان كبير صحيح ما أخدش دور البطولة بس وجوده كان لابد منه  وتقمصه للشخصيات رائع جدا  اسمه الحقيقى حسن إتله ممثل مصري  له أدوار شهيره  في أفلام  حماتي ملاك  واعترافات زوج مع  المهندس وفيلم  فيروز هانم  مع الطفلة فيروز  وفيلم لوكاندة المفأجات وظهر في سلسلة اسماعيل يس  في بعض الافلام زي في مستشفى المجانيين  وكان شكله زي الطفل الكبير تحس أنه طيب ومن أقواله الشهيرة  سى لطفى  وانتوا عارفين الباقى بقى .

بشاره واكيم ( اضحك كركر )

بشاره بواقيم

كتير من ممثلينا شوفناهم كتير  وبتكرر قدامنا  مشاهدهم السينائية ومن هؤلاء الممثل بشاره واكيم مين هو بشاره واكيم ؟ هو انسان مصري اتولد في عام 1890م  وعمل في التمثيل اللى كان  يسمى زمان بالتشخيص  ولما كان لسه ممثل صغير  اتقدم لفتاه من عائلة كبيرة فرضته العائلة ويجعل من هذا الأمر  تحديا بالنسة له لكي يحقق النجاح  والفعل  بدأ يأخذ أدوار البطولة من خلال فيلم  لو كنت غنى  مع عبد الفتاح القصري وانشهر جدا وبرغم شهرته الإ انه كان من جواه تعيس عشان  لم يتحقق هدفه بالزواج من  تلك الفتاه اتوفى بشاره في عام 1949 عن عمر 59 سنة بعد أن أثرى المكتبة السنمائية المصرية  بالعديد من الأعمال على سبيل المثال  قلبي دليلى ولست ملاكا  وانتصار الشباب  ....

                           

أنا لسه عملت حاجه

يعني يدوبك أحط رجلى في البيت ترفعوا على قضية دا فعلا اللى حصل مع الدكتور سعد الكاتتني اللى رفع عليه موظفوا مجلس الشعب دعوة خلاص يعني بقينا  فاضيين للدعاوي بسبب وبدون سبب مش مشكلة ارفعوا قواضي  ما مصر  أصبحت فيها فوضى قضايا بالكوم  طيب والعمل  أعتقد إن الأونطى في العهود السابقة خلت  فيه حاجات سمك لبن تمر هندي  محتاجين قانون واحد يمشى على الكل من الكبير للصغير واللى يغلط يتحاسب عشان ما تستمرش الفوضى والأونطى

                                            

مين اللى بنى الهرم ؟

السؤال ده غلب ناس كتير قوي   واكيد مر على بالك سؤال زي ده  ... أحيانا تقول الفراعنة وأحيانا تقول أكيد ما فيش بشر يقدر يبنى حاجه زي دي واللى بناه مخلوقات فضائية ولما أنتهينا  من الإجابة على السؤال  لقينا نفسنا بنسأل سؤال تاني  طيب اتبنى ازاي  يا دي الحيرة مين اللى بناه واتبنى ازاي  دماغي وجعتني بس لازم نعرف أن الغرب دايما بيحب يعمل أنه مفكر وإحنا اللى نايمين في العسل الهرم مصري والمصري بيعمل المعجزات  والدليل أهو اذا كان الفراعنة عملوا أهرامات ومعابد فالمصري الأن صنع ثورة تعد أعظم ثورات العالم   فبلاش نمشى ورا نظريات أونطى ....

أهرام الجيزة

                              

شرف فتح الباب

مسلسل من بطولة يحيى الفخراني وهالة فاخر  بيحكي قصة موظف شريف بيتحول الى لص يخفى الأموال قي خزان المياه أعلى السطح  ولما  شوفت دكتور عصام شرف على اكتاف الثوار في ميدان التحرير  مش عارف ليه ربط بين أسمه شرف وبين الأستاذ شرف  يمكن عشان اسمه ويمكن عشان الطيبة اللى على وشه بس كان عندي يقين أنه مش الشخص المناسب أبدا لمصر والأيام أثبتت فعلا الكلام يمكن يكون شريف  بس الأكيد ما كانش أمين على الثورة  وساب البلد تضرب تقلب من غير أي فعل ولا حتى رد فعل كل اللى كان بيعمله يطلع يتمسكن قدام كاميرات التليفزيون المصري  اهي عدت أيامه بس  وزارته كانت وزاره اونطى 

                                  

بطولة كأس الأمم الأفريقية

لما غابت مصر عن البطولة كنا خايفين من اليوم اللى هتتلعب فيه البطولة من غير مصر وخصوصا ان فيه فرق كبيره خرجت زي الكاميرون ونيجيريا وجنوب إفريقيا  يعني كانت فرصتنا سهلة جدا في ظل غيابهم  وحتى مع حضورهم  ما كناش بنخاف منهم أصلا . ولما جه معاد البطولة لقيتني بتفرج على حاجة تانية خالص وهى مجلس الشعب المصري  وبقيت مستنى  الجلسة وكأني مستنى نهائي كاس افريقيا  فقلت سبحان الله حقيقى ربنا له حكمه كبيرة في خروج مصر من البطولة دي  خلت كل مصر مركزه في السياسة وبقت الكورة  حاجه ثانوية بعد ما كانت اساسية في ظل النظام السابق  يعني البطولة أونطى  و المهم نطلع من الثورة وإحنا أقوي ونوصل بقى للمكانة اللى نستحقها .

                                              

أوبرا وينفري مصر ( الست غالية )

الست غالية

لما بشوف الرجالة من كافة بقاع الأرض والحريم كمان  بيكلموها بسأل نفسي ليه هي بالذات دي بقت زي أوبرا وينفري  في شهرتها إشي المان على طليان على فرانسويه على عرب من كل جنس  كلهم اتلموا حوالين غالية لدرجة أن برامج الطبخ التانية شعرت بالقلق  سبحان الله هي دي الكاريزما  هي دي البساطة  من غير تكلف ولا أونطه بتشدك بضحكك بتحببك في الناس  وهى صورة لأصالة مصر  ست من الطبقة البسيطة نجحت في الوصول لقلوب الناس أكتر من أبوتريكه في الأهلى وحازم امام  في الزمالك  على فكره  لسه في كلام كتير عن الست غاليه لانه  حقها أننا نفرد ليها كتب  يا بخته جوزها  وأولادها  وأعتقد هيكون هناك سباق عليها  على القنوات الأخرى  ومش خساره فيها أي فلوس بس ياترى قناة 25 هتقدر تحتفظ بيها أنا لو مدير القناة  أمضى عقد احتكار فورا معاها  لمدة 5 سنوات ......دا الاكتر من كده أعتقد أنها هتمثل  قريب  مين يقدر ينافسها في دور الأم  الحنونه غير فردوس محمد ...

ظاهرة مصرية بحق

أكلمكم بصراحة  عندما ظهر لأول مره كنت معجب بشخصه ياخي لو  الواحد شاف مذيع بيشتم وزير وبيقول عليه حرامي  بيعرف على طول  أنه صح  بس  بالنسبة لصاحبنا ده كسر كل المقاييس و الموازين وعارضة كرة القدم نفسها ...الكل بيشوف برنامجه بس الأغلبية بتشاهد عشان التسلية وانا شايف معاهم حق  فلقد جعل من نفسه  أسطورة لن تتكرر  يظهر عليه الحب الشديد لنفسه  والتعامل بعنف مع من يعمل معه في قناته    فهو ديكتاتور في قناته فكيف يرغب في ان يصبح رئيس  لمصر  وهو لم يستطيع الوصول الى مجلس الشعب  أقدر أقول أنه بيمارس نوع واضح جدا من الأونطى  السياسية وللأسف فيه ناس بتصدق ...الناس معزوره الراجل بيتكلم بشكل  فلاحى  وبيستخدم المصطبة كتير قوي في كلامه  بس يلا ما هو لولا الناس دول  ما كان الناس التانيين وما بين دول ودول هنشوف وهنسمع أونطى بالعبيط  ...أونطى 

لو لم أكن مصريا لوددت ان اكون مصريا

كلمة زمان قالها عم الحاج مصطفى كامل أصله كان وطنى قوي  ولكن بعد مرور عشرات السنين هل هذه الكلمه أصبحت ذات جدوى حقيقة ام لا وهل إحنا فعلا محتاجيين لشعارات وكلام ولا محتاجين لجهد وفعل مره سألت نفسي ليه المصريين عايشيين على المشاعر بس ليه مصر هى الأفضل عشان هى مصر  وكنت أسأل نفسي مصر ولا مثلا امريكا الأفضل  كنت بقول مصر طيب لو حد قالى تعالى هاجر أمريكا هقوله لا ولا أقوله موافق  طبعا هتقول موافق  يبقى انت هنا اونطجي قلت حاجه وعايز تعمل حاجه بس أنت عندك حق بصراحة امريكا بردك بلد متقدم ومتطور وبيحترم الفرد اللى  عايش فيه ....يعني المرحوم لو كان قال لو لم  تكن مصر متقدمه لوددت ان تكون متطوره  هي دي حياتنا نؤمن بحاجه ونعمل عكسها  وعندي  أمل إن الثورة تغير من سلوكنا وتكون المقوله بحق وحقيق مش  أونطة

الفيس بوك

مين اليومين دول ما بيستخدمش الفيس بوك  دا فيه ناس  عملت بيه المعجزات دا مبارك نفسه متعقد من كلمة فيس بوك  مين كان يصدق موقع زي دا يغير من كل حاجه في مصر لدرجة إنه بقى طريقة مكن  للتعبير عن الرأي بس المشكلة  كل واحد يعمل جروب ناجح تلاقى  عشرات  عامليين  جروبات تحمل نفس الإسم والفكر  وتبدأ حرب الجروبات  فتلاقى ملايين الجروبات  وكل واحد عنده  خمناشر تمناشر جروب وكلهم هو نفسه ما بيدخلش عليهم  وبيقينا نشوف جروبات غريبه وعجيبه .دا أنا حتى في يوم لقيت نفسي مضاف في جروب اسمه عمره المايله ما تخلف دكتور معلش دوشتكم معاي بس فعلا حقيقة علمية خالصة كل حاجه بتبدأ حلوة بيدخلها هجص وأونطى كتير ......أونطى

إعتصام يا برعي

برعي دا مصري غلبان  شغال في الجمعية الزراعية  وبعد ما بيخلص شغله بيروح بيته عشان يعاني بقى من حكاية كل يوم الست مراته  هي صحيح  مؤذية ولسانها زي الفرقله بس بصراحة  مدبره قوي  وبعد الثورة ما قامت كان عنده حلم  أنه يعيش زي الناس التانيين بس للأسف فقد برعي حلمه بعد ما شاف كل حاجه زي ما هي  والحال زي الحال فقرر برعي أنه يعتصم في التحرير  ..فطبعا لما شافوه الشباب رافع  يافطة ( إعتصام يابرعي) عملوله صفحة على الفيس بوك  وسموها  كلنا  المواطن برعي............ أونطه

ميدان التحرير

الثلاثة يشتغلونها

طبعا دا فيلم لياسمين عبد العزيز يحكي قصة فتاه تحقق المركز الأول على الجمهورية في الثانوية العامه ولكنها بعد أن تلتحق بكلية الأثار تكتشف أنها في وسط مجتمع غريب و ويدور الفيلم عن الاشتغاله  أو الأونطى التى يمارسها 3 أشخاص  وبكل صراحة الواحد صعبان عليه البنت ذنبها ايه  ( نجيبه ) 3 رجالة يشتغلوها  بس أرجع وأقول طيب ما  مبارك ونظامه إشتغلوا شعب بحالة 30 سنة وومن بعدهم المجلس العسكري ......................................وبكره  أونطى جديدة.

هي فعلا طنطا بلد الآونطى

طول عمرى أسمع المقولة دي  طنطا بلد الأونطى  و أنا أصلا عمرى ما روحت طنطا ولا شفت ناسها وهل هما  فعلا زينا  ولا زيادة شوية  ولما دخلت كلية اداب انجليزي طنطا قولت  أشترى حاجه من هناك ومش هكدب عليكم كانت حلويات ما هي مشهوره بالحلويات

1. ورجعت بيتي  وبفتح العلبة لقيت حلاوه مالهاش مثيل تقول مركونه من أيام الفراعنة وبرغم شكلها الحلو انما اتخميت فيها  بس قولت توبه من دي النوبه وعرفت ليه طنطا بلد الأونطى بس  مش عايز أظلم  كل الطنطاوية أكيد كل بلد فيها أونطى بس حظ طنطا أنها ماشيه مع أونطى والله اعلم  ........الى لقاء في أونطى جديدة

خدعوك فقالوا

                                                                                                                                        اليوم  كل سنة و حضراتكم بخير

 ذكرى ثورة اللوتس زي ما بيقولوا عليها  . مش هكدب عليكم  لما لقيت الجيش نازل وبيسلم على الثوار افتكرت أنه دا الجيش المصري اللى انتصر في عين جالوت وحطين و73  بس مع الايام لقيت نفسي في دوامه هل الجيش صح  ولا بيعمل علينا اونطى وحركات  ولما قعدت أسأل نفسي ليه المحاكمات  عامله زي الطبيخ الصايط لا طعم  لا ريحه اكتشفت حقيقة  أنها الظاهر والله أعلم  اونطى  ............. اللى اللقاء في اونطة أخرى 

أكتر حاجة بتزهقني

كل يوم أفتح التليفزيون دا لو فتحت أصلا و ولما الاقى حاجه حلوه ممكن أتفرج عليها تبدأ مأساتي مع الإعلانات إشي إعلانات طبية ورسميه وفوزية ويقعد الإعلان من دول 18 ساعة وأفضل مستنى واقول للصبر حدود زي الست ماقالت ولما يكبس على النوم يدوبك يخلص الإعلان طيب السؤال اللى قدامي دلوقتي ما جدوى هذه الإعلانات ؟؟؟؟ وهل هو حقيقة أم خيال يعني بينفع ولا كلام أونطى ... يعني مثلا في يوم عجبنى تيلفون وقولت لازم اشتريه ولما اشتريته فرحت بشكله وفي نفس اليوم طلع أونطى ضرب سماعه وشاشه وبقى كهنه فقلت عمري عمرى عمرى ما أشترى من التليفزيون تاني على العموم ٌ أقعدوا بالعافية